Milli aýratynlyklary hasaba almak bilen mekdep lybasy (formasy)
29 Декабрь 2013 г., 12:11

Dünýäniň köp ýurtlarynda kesgitli mekdep lybasy girizilendir. Pedagog-psihologlaryň barlaglarynyň esasynda gelnen netijä laýyklykda, kesgitli mekdep formasynyň girizilmegi okuwçylaryň sosial gelip çykyşyna, maşgaladaky ýaşaýyş aýratynlyklaryna, barjamlylyk derejesine garamazdan, olarda birek-birekden aýratyn tapawutlanmazlyk, agzybirlik, raýdaşlyk, özara duýgudaşlyk duýgusyny oýarmaga, esasy ünsi okuwa gönükdirmeklige ýardam berýär. Mekdep lybasyny kesgitlemekde dünýä ýurtlarynyň aglabasynda milli aýratynlyklara üns berilýär.

Hormatly Prezidentimiziň ýolbaşçylygynda ýurdumyzda ösüp gelýän ýaş nesli ruhy, ahlak we beden taýdan sagdyn, ylymly, bilimli giň göz ýetimli şahsyýet derejesine ýetirmek üçin yzygiderli işler durmuşa geçirilýär. Çünki ýurduň geljegi ýaş nesle bagly bolup, olar ertirki gün döwletimiziň halkara abraýyny has-da ýokarlandyryp, onuň ösüşlerine öz saldamly goşantlaryny goşmaly ynsanlardyr. Şol sebäpli hem, ýurdumyzyň röwşen geljegi bolan ýaş neslimizi zehinli, sagdyn pikirli, watansöýer, hoşniýetli, ukyply edip ýetişdirmek mugallymlaryň, terbiýeçileriň mukaddes borjy bolup durýar.

Hormatly Prezidentimiziň öwredişi ýaly, terbiýeçilik işinde ilkinji nobatda, milli gymmatlyklarymyzdan ugur almaly. Döwlet Baştutanymyzyň taýsyz tagallasy bilen milli mirasymyz täzeden öwrenilip başlandy. Bu bolsa ösüp gelýän ýaş neslimizi milli ýol-ýörelgelerimiz arkaly terbiýelemekde uly ýardam berýär.

Hakykatdan hem, çaganyň terbiýesine daşky faktorlar bilen bir hatarda, onuň geýýän egin-eşiginiň hem täsiri uludyr. Şonuň üçin hem, biz umumy bilim berýän orta mekdeplerde okaýan gyzlaryň-da mekdep lybasy biraz üýtgedilse, ýerlikli bolar diýip umyt edýäris. Şu meselede aşakdakylary teklip edýäris:

1. Tahýa (öz el hünärimiz bolmaly);

2. Saçlaryny ýüpekden edilen gara lenta bilen örmeli(ene mamalarymyz saçlarynyň düşmezligi üçin ýüpekden edilen lentany peýdalanypdyrlar);

3. Yaşyl kostýumyň ýerine ýaşyl begresden tikilen kostýum (nagşy inçeden nepis el hünärmiz bolmaly);

Eger biz gyzlarymyzda millilige bolan söýgini çagalykdan aňyna berk ornaşdyrsak, biz üçin has hem gowy bolar. Çagalar el hünärimiziň inçe syrlaryny bilmek bilen olaryň her biriniň ýüreginde millilige bolan beýik hormat dörederis. Şeýle-de ata-babalarymyzyň “E1 hünäri - il gezer” diýlişi ýaly, biziň el hünärmiz ýitmän, geljekki nesillerimize hem miras galar. Şeýle-de her bir türkmen maşgalasynyň eli hünärli bolar. Çünki türkmen milletini özboluşly owadan edýän pursat, ol hem onuň milliligidir.

Oglanlar üçin tahýa salyhatlygyň, milli buýsanjyň çeşmesi bolmaly. Ol elmydama olara türkmendigini, ata-babalarymyzyň şöhratly taryhyny, milli mirasyny ýatladyp durmalydyr. Tahýa — biziň millimigimiziň güwäsi. Biz ony buýsanç bilen depämizde täç kimin götermelidiris.